周日晚英超壓軸之戰，富咸主場對利物浦，「神經刀」富咸往往遇強愈強，今季曾經令多支傳統勁旅吃盡苦頭，「紅軍」造訪倫敦想贏波，並非易事，尤其是利物浦近期狀態走下坡，進攻效率偏低，加上近10場聯賽作客，有9次上半場總入球開1球或以下，寧願博中位數1.5球嘅半場細。（Now聽621及611周日晚11時30分直播）

富咸夠硬淨頂得住
富咸上場聯賽作客以2比0擊敗韋斯咸，結束連續3場不勝頹勢，防線表現有明顯改善。呢支倫敦球隊今季最為人津津樂道係專剋豪門，包括曾於主場擊敗阿仙奴、熱刺，作客贏曼聯，仲有1月英聯盃4強次回合主場打和利物浦1比1，即使兩回合合計出局，但已贏盡口碑，所以今仗再次喺卡雲農舍球場迎戰「紅軍」，有力同對手周旋到底。

至於利物浦踏入季尾後勁不繼，上輪聯賽主場大熱倒灶，以0比1不敵水晶宮，導致爭標形勢陷入被動，加上上周中歐霸盃8強被阿特蘭大淘汰出局，進一步打擊士氣，要擊敗富咸，恐怕舉步維艱。特別係上半場富咸球員仍然體力充沛嘅時候，可以利用硬朗踢法破壞「紅軍」攻勢，預料屆時戰局會出現膠着，入波唔會多。