話咁快歐國盃就已經嚟到16強階段啦！

衛冕嘅意大利相信都幾令球迷失望，佢哋喺分組賽要力拼至最後1分鐘先驚險晉級。嚟到16強，整場賽事被瑞士控制住節奏而毫無搏擊之力，全場更只得1次中龍嘅射門，最終慘吞兩蛋，宣告衛冕失敗。

而要數最驚喜嘅當然就係首次打入決賽周嘅格魯吉亞啦！3場分組賽都有入波之餘，第三輪更以2:0擊敗葡萄牙，成功以最佳第三名身份，再次創造歷史、躋身淘汰賽。對戰西班牙無論賽果如何，都會係充滿新鮮感嘅戲碼。

至於F組另外兩隊，葡萄牙會於周二凌晨對斯洛文尼亞；土耳則會喺周三凌晨惡鬥奧地利。

奧地利都算係今屆黑馬，小組力壓法國以首名出線、贏波嗰兩場都入到3球，表現亮眼，今場面對防守力欠奉嘅土耳其，贏波應該冇難度。至於憑最佳第3名晉級嘅斯洛文尼亞，雖然火力唔強，但老實講，睇葡萄牙暫時嘅表現，起碼唔會被炒。如果過份睇好葡萄牙，各位就要睇路嘞。 Vicki趙小姐