今晚英冠上演好戲碼，侯城主場火併米杜士堡。侯城易帥後明顯有起色，近5場有3場搶到分；「米堡」作客向來有前冇後，隨時合演入球騷，2.5球大盤有計。（無綫myTV SUPER周四凌晨1時30分直播）文:法達斯維

侯城之前衰過「地底泥」，一度經歷6連敗，見到都唔開胃，上年12月頭果斷換帥，請來西耶斯接手。呢位前修咸頓及雷丁教頭領軍5場成功止血，取得2勝1和2負，搶到7分，包括上場擊敗前列分子布力般流浪，令護級重現曙光，依家勢頭咁好，梗係唔會畀佢停，必定藉地利搏盡搶分。

「米堡」喺曼聯名宿卡域克帶領下，一直以升英超為目標，呢班波不嬲崇尚進攻，今季踢咗24輪聯賽入咗41粒，係英冠入波第二多球隊，不過進取打法亦搞到失波唔少，今季已失咗31球，喺前10球隊中失波較多嘅一隊，成為佢哋爭取重返英超嘅絆腳石。

米堡作客更進取
值得一提「米堡」作客更加進取，近11輪攻入22球，作客火力屬英冠之最，同時失番17粒，正宗入得又失得，單計近7場作客，佢哋就有6次開3球或以上，今晚對住重拾信心嘅侯城，預計雙方盡情駁火，實多波入。