喺女子世盃首輪光芒四射嘅哥倫比亞前鋒蓮達卡絲杜，喺周四操練期間突然感到不適，更一度倒地昏迷超過90秒。雖然呢位18歲「抗癌射手」獲軍醫即時搶救，回復意識後再送入醫院檢查，但能否繼續上陣卻係未知之數。

18歲嘅蓮達卡絲杜曾患上卵巢癌，經過兩年抗癌治療後，如今不但入選國家隊踢世盃，喺首輪對南韓女足，首度亮相即建功，寫下12個月內分別喺Ｕ17世盃、Ｕ20世盃同世盃入波，被視為足球「童話故事」。不過周四訓練期間，卡絲杜喺跑步期間突然按住胸口，跪低後更一度昏迷超過90秒，軍醫即時衝去搶救，好在佢上擔架床後就恢復意識，即刻送入醫院檢查。

哥倫比亞稱壓力太大所致
事後哥倫比亞女足官員透露，蓮達卡絲杜係因為壓力同體能需求太大而出現症狀，但未知同佢之前嘅抗癌治療有冇關係，亦冇交代佢可唔可以繼續出席今屆世盃。哥倫比亞女足會喺周日對德國女足，進行H組第二輪賽事。