另一場A組對決則為「榜首大戰」，拜仁慕尼黑主場對加拉塔沙雷，德甲勁旅拜仁3戰全勝，實力大超班，今仗只要贏波，就可以提早出線，為免夜長夢多，必定先下手為強，加上射手哈利卡尼大勇，有力迅速打開紀錄。以拜仁跨屆近7場歐聯分組賽主場有6次上半場領先嘅走勢，再追半場主勝。（Now聽646周四凌晨4時直播）

拜仁慕尼黑踢歐聯分組賽一向鶴立雞群，過去兩屆都以6戰全勝姿態首名出線，今屆延續霸氣走勢，首循環已經贏過晒同組3支對手，包括作客以3比1擊敗加拉塔沙雷，可見雙方實力有明顯距離，更何況拜仁今仗有地利，相信會贏得更輕鬆，特別係前鋒哈利卡尼腳風非常順，上仗德甲又射入3球，協助拜仁大勝多蒙特4比0，呢位英格蘭國腳已經連續兩場聯賽上演「帽子戲法」，今季各項賽事為拜仁上陣14場入17球，預料加拉塔沙雷後防招架唔住佢。

加拉塔沙雷防線勁曳
事實上，加拉塔沙雷防線脆弱，今屆歐聯3場分組賽已經合共失咗7球，而且3場都先落後，包括首循環主場開賽8分鐘就被拜仁攻破大門，甚至對住同組最弱嘅哥本哈根，都一度落後2球，踢到比賽末段先至逼和2比2，今仗去到安聯球場，相信踢完上半場就「投降」。