英超中游搶分大戰，近況愈戰愈勇嘅般尼茅夫，主場迎戰富咸。般尼茅夫近6場5勝1和，每場起碼射入2球，攻力強橫，射手蘇蘭基弗到漏油，有望添食，富咸作客表現不濟，近5場聯賽作客只得1和4負，今場凶多吉少，般茅只讓平半，上盤極抵玩。（Now聽621周二晚11時直播）

般尼茅夫呢5場勝仗都有遇到硬嘢，包括主場2比0擊敗紐卡素，以及前仗作客3比0大勝曼聯，含金量高。聖誕快車首站，佢哋作客諾定咸森林，落後一球之下反勝，尤其蘇蘭基喺補時射入絕殺波，大演帽子戲法，更令球隊士氣大振。

蘇蘭基今季大熟大勇，呢名車路士青訓產品曾經協助英格蘭勇奪2017年世青盃冠軍，仲成為當屆最佳球員，雖然曾經加盟利物浦，但搵唔到適合位置，嚟到般尼茅夫就愈戰愈勇，今季射入11球，排英超射手榜第4位，有力爭取加入下年歐國盃「三獅兵團」大軍名單。

富咸近5場作客4敗
富咸雖然只同般尼茅夫相差1分，但佢哋今季聯賽集中喺主場搶分，作客表現非常不濟，全季9戰只贏過1場，而且作客失球數字只比榜尾嘅錫菲聯少，近5場聯賽作客只得1和4負，今場遇着大勇嘅般尼茅夫凶多吉少，推介般茅上盤。