意大利盃8強上演「首都打吡」，拉素掛名主場迎戰羅馬，兩隊近況有明顯分別，拉素回勇取得3連勝，反觀羅馬近期屢受挫折，加上教練摩連奴去留成疑，亦影響軍心，正所謂寧捧當頭起，今場開平手盤，最好揀拉素。（周四凌晨1時開賽）

拉素上月喺歐聯及意甲，因為分別遇上勁旅馬德里體育會、國際米蘭，導致遭受2連敗，幸好近期賽程比較易踢，連贏3場有助球員重拾信心同士氣，正好為今仗打吡戰壯聲勢。雖然射手恩莫比尼有傷在身，難以披甲，但佢近兩場缺陣之下，拉素仍然保持攻力，可見影響不大，代替恩莫比尼位置嘅卡斯迪蘭奴斯有出色發揮，包括早前主場對費辛隆尼，射入1球及有1次助攻，拉素有力攻破羅馬大門。

羅馬「寸王」去留成疑損軍心
至於羅馬上輪意大利盃16強，對住乙組球隊克雷莫納都陷入苦戰，踢到末段靠博到12碼，驚險反勝2比1，表現令人失望。喺意甲方面，「雌狼」亦唔好得幾多，上仗主場鬥阿特蘭大，同樣靠獲得12碼，勉強逼和1比1，教練摩連奴更加被罰紅牌。呢位葡萄牙名帥將於季尾約滿，但仍未續約，盛傳可能離隊，恐怕未必可以帶領球隊反彈。加上羅馬近3次對拉素，只有1和2負，今仗凶多吉少。