西甲煞科日，焦點落喺護級戰場，6隊之中有1隊唔好彩會降班，排尾4嘅切爾達將會主場迎戰出爐西甲冠軍巴塞隆拿。形勢上切爾達今場贏波即上岸，如果失分就要望天打卦，不過佢哋並唔係冇機會，事關巴塞奪冠後表現放鬆，近4仗上演入球騷，全開3球或以上，預計今場兩隊會鬥攻，2.5球入球大有計。（周一凌晨3時開賽）

西甲護級形勢混亂，除咗艾爾切同愛斯賓奴篤定降班，18位嘅華拉度列到13位嘅卡迪斯，6隊積分在2分之內，現時最有危機嘅當然係華拉度列，輸波即降，但切爾達排17位，僅比華拉度列多1分，危險系數高企，煞科戰對手就算係巴塞隆拿，都要放手一搏搶攻入波。

巴塞今季表現平穩，有一大段時間靠嚴密防守，然後小勝1比0攞分，不過自從奪冠後風格大變，改為同對手鬥攻，近4仗2勝2負，包括輸畀皇家蘇斯達同華拉度列，全開3球或以上，今場對住搏老命嘅切爾達，相信入球唔會少。