英足盃第3圈重賽，英冠嘅布里斯托城主場挑戰英超韋斯咸，兩隊上次交鋒踢成1比1，重賽對傷兵滿營兼賽程緊密嘅「錘仔幫」絕對係最差結果。韋斯咸攻擊線傷嘅傷、走嘅走，要咬入布里斯托城嚴密防線唔容易，今仗博2.5球入球細穩陣。（無綫myTV聽SUPER周三凌晨3時45分直播）

韋斯咸今季兼顧聯賽同歐霸盃，密集賽程下開始出現疲態，上仗迎戰布里斯托城被逼和之餘，仲有盧卡斯柏基達同查洛保雲受傷，前者據報傷勢嚴重可能要抖兩個月，查洛保雲足踝受傷唔算嚴重，但今仗多數都唔踢得，加上箭頭米查利安東尼奧操練時又受傷，古達斯離隊踢非國盃，「錘仔幫」前面冇晒人，連原本將被外借嘅丹尼艾格斯都要暫時留低幫手。

布城近4場僅入1球
韋斯咸近4場2勝2和，靠嘅係穩健防守，4場總入球全開2球或以下。布里斯托城近4場不勝，期間只係入過韋斯咸1球，不過防守唔差，4場總入球同樣係少於3球，今仗面對「錘仔幫」相信會繼續主守，再追2.5球入球細係明智之選。