亞洲盃A組第2輪，東道主卡塔爾迎戰塔吉克。卡塔爾首仗3比0大炒黎巴嫩，今場對世界排名更低嘅塔吉克，3分可謂志在必得，而且佢哋對弱隊絕不留手，例如去年11月世盃外曾以8比1大炒阿富汗，加上近5場全部半場領先，半場主勝捧得過。（HOYTV77台周三晚10時30分直播）

卡塔爾雖然半途接手主辦今屆亞洲盃，但佢哋前年成功舉辦過世盃，所以今屆賽事運作暢順，最重要係佢哋作為衞冕球隊兼東道主，首場賽事就以3比0擊敗黎巴嫩取得開門紅，只要今場再贏塔吉克，出線16強就坐定粒六，肯定搏盡。

近５場全部半場領先
睇番卡塔爾首仗表現，一對箭頭阿克林阿費夫同阿莫爾斯阿里都順利開齋，前者梅開二度，後者1入球1助攻，而且上半場就已經打破僵局，有個美滿開局，相信呢對前鋒今場繼續添食。
至於塔吉克係A組實力最弱球隊，今次亦係佢哋歷來首次出席亞洲盃決賽周，首仗對中國守和0比0令人喜出望外，不過今場鬥東道主卡塔爾取勝機會渺茫，只能輸少當贏，而且卡塔爾勢必收起輕敵心態，務求盡快撕開缺口，塔吉克好難守得住。