今晚於中立場捷克上演嘅歐協聯決賽，意甲勁旅費倫天拿硬撼英超「錘仔幫」韋斯咸。雖然費倫火力強勁，但「錘仔幫」今屆14仗歐協聯贏咗13仗，實力超晒班，有力贏波捧盃，一於捧韋斯咸「冠軍」。（Now聽643周四凌晨3時直播）

費倫天拿喺今屆歐協聯狂轟36粒，火力冠絕群雄。不過「紫百合」最大問題係防守，踏入淘汰賽後打咗8仗，只得兩仗能夠保持不失，8強首回合作客大勝列治普斯納4比1，諗住實食冇黐牙，點知返主場竟然先失3球，總比數畀對手追平，好彩佢哋之後連入兩球，最終才能夠驚險晉級。

費倫天拿防線欠穩
費倫跟住4強首回合賽事，喺先開紀錄下，再遭巴素利反勝，次回合要打到加時先能夠贏波出線，連同早前意盃決賽對國米，早早入波下反勝為敗，以尼高拉米連高域為首嘅防線欠穩，成為今仗大戰嘅隱憂。

安東尼奧腳風順
另邊廂，韋斯咸喺歐協聯如虎入羊群，連同外圍賽在內，今屆14仗豪取13勝1和從未輸過嘅佳績，前鋒米查利安東尼奧近6仗歐協聯入5粒，腳風奇順，仲有查洛保雲、賓華馬、盧卡斯柏基達等後上支援，攻力絕不遜色；防守方面14仗只失8粒，比失咗17球嘅「紫百合」更穩陣。唔計1999年圖圖盃，「錘仔幫」自從1965年勇奪歐洲盃賽冠軍盃後，未嘗稱霸歐洲賽，為一搔58年之癢，今仗必定搏甩髀，捧佢哋奪冠。