美洲盃8強大戰，哥倫比亞對巴拿馬，兩隊實力有一定差距，哥倫比亞今屆演出對辦，創造力同侵略性極強，分組賽2勝1和，連同決賽周前，近6場賽事，5次半場總入球開2球或以上，1.5球半場大必捧。（HOYTV聽77台周日早上6時直播）

J洛回勇添火力
哥倫比亞表現出眾，全賴占士洛迪古斯，呢位曾經於2014年世盃一鳴驚人嘅中場，經歷喺皇馬受傷，外借拜仁冇表現，再到愛華頓亦踢唔出水準，之後轉戰中東及希臘搵食，上年就轉投巴甲聖保羅，漸漸遠離球迷眼球，上屆美洲盃更落選大軍名單。不過32歲嘅「J洛」今屆表現重拾光芒，3場分組賽貢獻3個助攻，哥軍更有利物浦射手路易斯迪亞斯領軍，所以佢哋經常喺比賽早段就搶攻，爭取領先。

巴拿馬分組賽人多打人少下擊敗美國，成為出線關鍵，上場贏玻利維亞亦唔意外，不過球隊同頂級勁旅仲有差距，首仗對烏拉圭就先失3球下輸1比3。巴拿馬晉級8強，今屆美洲盃之旅已有交代，今場會貫徹進取踢法，博下盡早入球波，半場大值博。