車路士同阿仙奴目前同得18分，未計今輪排英超第4及第5位，「車仔」得失球佔先，估計今晚打吡勢均力敵，埋門把握力將主宰勝負。

「藍戰士」射手腳風順
「藍戰士」上輪聯賽逼和曼聯1比1，中場摩西斯卡些度一腳世界波幫球隊搶番1分，之後歐協聯派B隊出擊，主場炒阿美尼亞球隊FC諾亞8粒，球隊士氣冇得頂。主帥馬利斯卡大讚球隊專業精神，對住同市勁敵阿仙奴，會保持近期進攻風格。雖然高爾彭馬傷勢未明，但祖奧菲歷斯、梅迪歷及尼干古近期腳風甚順，面對近況麻麻的「兵工廠」後防，入波只係時間問題。

阿仙奴連續兩場作客，同樣以0比1不敵紐卡素及國米，進攻啞火令主帥阿迪達相當頭痛，隊長馬田奧迪加特啱啱復出，又到賴斯有輕傷在身，兩人狀態或有一定影響，作客車路士要利用布卡約沙卡嘅突破能力，製造機會畀李安度杜沙特及夏維斯數胡。雙方近況此起彼落，估計同樣唔會縮，球迷等睇精彩入球騷。文:謝德謙