今日下晝澳職獨腳戲，FC悉尼主場迎戰珀斯光輝。FC悉尼唔單止主場特醒，而且對親珀斯光輝例搶韁，今場勢必於初段照辦煮碗搶攻，主W太熱冇肉食，轉捧半場主勝。

（無綫myTV SUPER周三下午4時直播）文:法達斯維

FC悉尼近5場贏得1場咁大把，飄忽到暈，上場鬥紐卡素噴射機落後2球下，末段僅僅逼和，但細心睇睇當中3場係客場，包括作客逼和勁旅阿德萊德聯3比3，絕對唔失禮。查實FC悉尼都係靠主場搵食，近4次主場出擊獲3勝1負，其中近3次於上半場已取得領先優勢，證明佢哋喺自己地頭比賽，都會先發制人。

光輝易失波博埋半大
另邊廂，珀斯光輝真係弱過弱雞，近8場聯賽輸咗6場，只係贏過同佢哋一樣「難兄難弟」嘅布里斯班獅吼，上場對住西部聯竟然神奇地兩度領先，可惜最終仍然反輸2比3，咁樣輸法都幾打擊士氣。翻查紀錄，雙方近6次正面交鋒，FC悉尼有5次半場領先，似乎對親珀斯光輝都玩速戰速決，半場主勝值得捧場。由於FC悉尼初段急攻，近4次主場半場全開2球或以上，1.5球半場大可兼投。