力求反彈鬥搶攻
周五澳職大戰，墨爾本勝利主場迎戰FC悉尼，兩大名牌近期狀態低迷，墨爾本勝利連續6場不勝後，已經跌出季後賽區域；FC悉尼都唔好得幾多，近兩場只得1和1負，為爭取盡快反彈，今場唔會有乜保留，兩隊都心急搶分，相信一開波就會埋牙駁火，中位數1.5球半場大博得過。

（無綫82台周五下午4時35分直播）文:工廠仔

主隊入得又失得
墨爾本勝利開季即撻着，但去年12月底開始突然出現低潮，教練阿瑟迪尼斯試圖用強攻戰術走出低谷，近3場都率先入波兼有7個入球，可惜前面入埋唔夠後面輸，近3場賽事亦失咗9球。墨爾本勝利今次主場出擊，肯定希望繼續搶先入波，佢哋近5場有4次半場開2球或上，相信頭45分鐘已經會攻得燦爛。

FC悉尼上場以3比4輸畀布里斯班獅吼，新加盟前鋒蘇迪里奧首演後備上陣，效果立竿見影，今場預料會擔正領導鋒線，佢嘅速度有力撕破墨爾本勝利鬆散防線，而且FC悉尼季初曾3比0大勝墨爾本勝利，球員信心爆棚，就算作客仍無懼鬥攻，博1.5球半場大係明智之選。