今晚意甲優先場，國際米蘭主場迎戰維羅納，雖然雙方實力有一大段距離，但榜首國米狀態有所下滑，近5場比賽法定時間僅2勝，總入球全開2球或以下，加上首席射手拿達路馬天尼斯有傷在身，上陣成疑，恐怕炒唔起維羅納，主W太熱冇肉食，寧願博中位數3.5球嘅入球細。
（Now聽638周六晚7時30分直播）

維羅納死守博1分
國際米蘭原本走勢唔錯，但球隊畢竟三線作戰，嚟到季中難免出現疲態及傷兵問題，近期唔止喺意大利盃被博洛尼亞淘汰出局，上場聯賽亦被弱隊熱拿亞逼和1比1，已經被第2位祖雲達斯追到得2分距離。屋漏偏逢連夜雨，以15個入球排射手榜第1位嘅拿達路馬天尼斯近期受到傷患困擾，已經連續缺陣2場聯賽，今仗亦上陣成疑，如果呢位阿根廷國腳繼續倦勤，國米更加無力大勝。

至於維羅納自知實力唔及對手，應該會加強防守，以博取1分為目標，預料就算輸波，亦唔會大敗。事實上，維羅納近6場聯賽取得1勝3和2負，兩場敗仗都只係輸0比1，加上4仗總入球全開2球或以下，不妨再追入球細。